كتبت .ماهيتاب احمد عبد الباسط
اعرف أُم مصاحبه بنتها لدرجه ان كل اسرارهم وحكايتهم مع بعض وتشوفهم متعرفش مين اللى بنت مين
* اعرف بنت باباها بعد ما خدت ثانوى عام وراحت هى واخواتها البنات الى البلد العربى اللى بيشتغل فيه ونزلت المطار لقيته عاملها بلالين وهيصه فى المطارومفاجاءات فى البيت احتفالا بالنتيجه بتاعتها
* اعرف أُم كان مستواها دراسياً وهي طالبه عادى واقل كمان
ولما اتجوزت وخلفت وولادها ابتدوا يدخلوا مدارس لغات اخدت كورسات انجلش واثقلت لغتها علشان تبقى مجرياهم ومتسيبهومش للمدرسين بس
* اعرف أب كان عامل قانون ان ولاده مهما كل واحد مشغول وهو مشغول طول اليوم لازم يتغدوا كلهم على السفره مع بعض علشان يطمنوا على بعض ويقضوا وقت فى ظل انشغالاتهم
* اعرف أُم كرست كل مجهودها تعرف ايه هوايات ومواهب ولادها واتنطتت فى كل الملاعب والكورسات لحد ما عرفت ان ابنها بيحب الاسكواش وبنتها غاويه باليه
* اعرف ام اتشغلت شويه فى درستها فابنها حس وبقى مش عايز يختلطت بالناس ومبيتكلمش معاهم ولما عرضته على دكاتره قلولها تخاطب وقصه طويله
مستسلمتش للكلام ده وكرست كل وقتها انها تنزله واشتركت فى نشاطات لحد ما الولد ده ماشاء الله بقى من الطف والذ الاطفال اللى ممكن تشوفهم
* اعرف ولاد وبنات باباهم كان بيتناقش معاهم فى كل المواضيع السياسيه والاقتصاديه وكمان اى موضوع جديد مش فاهمينه ويعملوا بحث بالكتب ويقروا مع بعض من وهم صغيرين
و دلوقتى بعد ما كبروا لما بيقعدوا مع بعض قدام الناس تحس انهم شباب واعى مثقف
* اعرف اهل عاملين قوانين فى البيت
كل يوم الصبح يبتسموا فى وش بعض مهما كانت الظروف وكلام لازم بتقال صباح الخير وشكرا وتصبحوا على الخير واتفضل
وبعد اذنك…
* اعرف أُم وأب ايا كان الخلاف بينهم عميق وكبير كان بيتم النقاش فيه فى غرفه مغلقه بعيد عن الاولاد اللى دايما شايفنهم مع بعض ازواج مثاليين
* اعرف اب علشان يحبب ولاده فى الصلاه كان بيخلى كل واحد فيهم يبقى امام مره باللى هو حافظه حتى لو ايه ويبتسم فى وشهم بعدها ويمدح فيهم
لحد ما الولاد بعد ما توفاه الله كل رمضان بيصلوا بالناس تراويح فى المسجد اللى تحت بيتهم
** واعرف اشرف الخلق سيدنا محمد صل الله عليه وسلم وعلاقته بالسيده فاطمه بنته
فكان إذا سافر كان آخر الناس عهدا به فاطمة و إذا قدم من سفر كان أول الناس به عهدا فاطمة
ممكن جداً تكون الحاله العامه دلوقتى ضيق فى الارزاق ومستويات المعيشه وانشغالات وسفر وغيره وده بيسبب ضيق للاهالى
بس مين قال ان التربيه بس فلوس او ان مسؤوليه الاهالى بس تجاه ولادهم ماديه او بس امر بالمعروف والنهى عن المنكر
“كلكم راعٍ وكلكم مسئول عن رعيته”
كلموا ولادكوا واتناقشوا وقربوا منهم الدنيا صعبه عليهم فخليكوا حنينين عليهم
#متصعبوش البر على ولادكوا وترجعوا تقولوا عقوق …
ربنا يحفظلنا اهلينا من كل سوء ويعينهم علينا ويعينا على طاعتهم وبرهم 
وربنا يقدرنا ويعينا ونربى ولادنا صح زى ما ربنا يحب ويرضى
