الشيف .حليمه صالح
طريقه عمل البسبوسة
البسبوسة الخطيرة بجد 
تعالو لما اقولكم على المعيار وتكات نجاح البسبوسة وتكون زي الجاهزة من أشهر المحلات وأحلى كماااان بكتتتير .. 
اول حاجه امشي على المعيار ده بالظبط
2كوب سميد بسبوسة
3معالق جوز هند
3معالق سكر
معلقه صغيرة بيكينج بودر
نص معلقة صغيرة فانيلا
•كل المقادير الجافه التي ذكرت سابقا توضع في بول وتقلب جيدا .. ودي اول تكه 
•تاني حاجه في اناء على النار يتم وضع السوائل الاتيه
تلتين كوب سمن
تلتين كوب زبادي ممزوج بلبن حليب
نص كوب عسل جلوكوز او عسل نحل المتوفر
•يتم تسخين المكونات السائل لا نتركها تغلي تكون ما بين الدافئ وأول درجه في التسخين وتوضع السائل على الجاف ويقلب بملعقه سيلكون او خشب تقليب فقط لامتزاج المكونات .. ودي تاني تكه
•تالت تكة ان الخليط لا يكون سائل اوي ولا تقيل اوي بيكون متوسط السمك
•رابع تكه بنفرد المعيار السابق في صينيه مقاس 28 مدهونه بطحينه وسمنه الاتنين
•خامس تكه ودي مهمه نسيب البسبوسه في الصينية قبل ما تدخل الفرن لمدة نص ساعه عشان حبات السميد تتشرب السوائل كويس والعجينه تمسك وتتقل
•سادس تكه بندخلها فرن سخن اول ما الحواف تحمر نشغل الشوايه عشان الوش يحمر كويس جدا
•سابعا تسقى البسبوسه بشربات ساخن وهي تكون سخنه والصينيه دي بتاخد كوبين شربات كاملين وما تخافيش البسبوسه هتتشربها كلها والمشروبات تكون خفيفه مش تقيله كوبين سكر مع كوبين ماء ونص ليمونه وفانيلا يغلو 5 دقائق فقط
•تامن تكه وأنك بترجعي الصينيه في الفرن وهو سخن بس مش شغال لمدة 5 دقايق
•تاسع تكه ودي مهمه طلعي الصينيه وغطيها كويس وسيبيها ساعه عشان البخار يخليها طريه وتتشرب كويس العسل
•عاشر تكه دخليها التلاجه على الاقل 3 ساعات قبل ما تقطعيها وتقدميها وياسلام لو معاها قشطه بلدي في طبق التقديم 
والف هنا يارب
