خاطرة بو مع بسمة جمال العدل

choose to be happy. No person will make you happy unless you decide to be happy. Your happiness will not come to you. It can only come from you.
– Ralph Marston

احنا مختلفين !
كل واحد فينا ليه نضارته اللي بيشوف بيها الدنيا و العالم !

عشان كده في حد بيبقي شايف إني ممكن أكون بقدمله طاقة ايجابية ، في حد تاني بمنظور تاني يقوم قايل انتي جايبة التفاؤل ده منين !

حد تالت شايف إن اللي بيحاول يصدر الحلو فهو انسان مُنعم و معندوش عقبات و لا مشاكل !

حد رابع شايف إن ايه الفضي ده !

الحقيقة بقي إن كلنا مُنعَّمين و كلنا عندنا عقبات و مشاكل و كلنا فاضيين و مش فاضيين علي حسب !

كلنا بنعدي بفترات ups و فترات downs و فترات تانيه عادية ماشية في خط سير ثابت و مستقر لحد ما ..

كلنا ربنا خلقنا بعقل و ادلنا إمكانيات مختلفة ، في اللي بيعرف يسخرها للخير و يستفيد بيها أقصي استفادة ممكنة ..

و في اللي مغمي عينه و مش عايز يشوف أصلا و ماشي سارح و تايه في الدنيا مستني يموت !

مش مشكلتي و لا مشكلة حد إني اختارت و اختياري غير اختيارك ..

أنا اختارت و بكامل قواي العقلية إني أكون سعيدة !

اخترت أتمتع بلحظات عمري اللي ربنا أنعم عليا بيها !
اخترت استغل صحتي و عقلي في المنفعة و الخير ليا و لغيري !

اخترت أشوف الحلو فاللي حواليا !

اخترت أشوف ممشيش مغمية !

اخترك أتمتع بحواسي و أشبعها !

اقتنعت ان جوا أي وحش أكيد في حلو !
و ان كل شر في باطنه خير ..

أيقنت بربنا و وجوده و كرمه و لطفه و رحمته و صفاته كلها ..

طب ليه و ازاي ؟؟

ببساطة عشان الحياة فعلا بسيطة و احنا اللي معقدينها ..

ببساطة عشان لما كنت بعمل عكس كده و بغرق نفسي في الضيق و الزعل و الإكتئاب أوي ، حقيقي بمرض و بتعب و بعاني و بتألم جداً ..

انتم عارفين ان التوتر و الإكتئاب و الضيق و الزعل و القهر بيموتونا فعلياً ؟

مازلت بتوتر و بقلق و بكتئب ، بس جنب ده بحاول انتشل نفسي مسبهاش تغرق لتحت أوي أوي كده ..

بحاوط نفسي باللي بيحبوني بصدق من قلبهم ..

بعمل أي حاجة بحبها بالذات أبسط الحاجات و كان أهمها الكتابة ❤ ..

بحاول أعمل أي حاجة تقربني من ربنا من أعظمها الكلمة الطيبة و جبر الخواطر .. و أقول لنفسي لعلها المنجية !

انوي خير و افتح عينك و شوف الحلو و ركز فيه ..
حس بقلبك كل جمال و خير ربنا خلقه ..
خد نفس عميق و بص للسما و جمالها و كلم ربنا هيسمعك و يطمنك ?

استشعر النعم و عدها كده كل يوم ، و احمد ربنا و اشكره عليها و اطلب منه يديمها ?

و متنسوش الدعاء بظهر الغيب لعلها ساعة إجابة ?

سهلة و بسيطة والله و احنا اللي معقدنها ?

ركز في الحلو هيجيلك و يزيد ❤

اللهم اسعد قلبي و قلوبكم و قلوب كل من نحب ..
اللهم ارزقنا نور الطريق ، و العزم في السعي ، و الهدي و الرشد ، و السلام و السكينة ، و العفو و العافية ?

اللهم نورك .. اللهم نورك .. اللهم نورك .. فلا نضل يا رب العالمين ❤

#سهلة_و_بسيطة
#ركز_و_اختار
#دور_علي_الحلو
#ups_and_downs
#حاول
#استشعر_النعم
#السعادة_قرار
#خاطرة_بو