نور

كتبت .آلاء إبراهيم

نور

كل الأماكن الحلوة اللي بنشوفها في الصور ممكن نسافرلها بخيالنا واحنا بنشرب كوباية ينسون حفاظاً على الباقي مننا في الشتا وبرد الشتا ..

وكل الأصحاب اللي كانت بتجمعنا بيهم ذكريات لطيفة زمان بس مبقوش موجودين نظراً لظروف الحياة وانشغال كل واحد فينا ممكن نقابلهم في دعوة ساعة آذان أو في صلاة قيام ..

انا اكتشفت إن اللحظات الحلوة مهما كانت قصيرة بتطول العمر ! ..

من فترة كنت بقرأ مقال عن ظلمة القبر والحقيقي بقالي شهور بمر بوعكات صحية بتقربني من الموت للحظات ومن رب الموت خطوات ف الحمدلله على كل حال ♡ و كان في حد سأل شيخ عن نور القبر وازاي ده بيحصل مع إنه مكان ضيق جدا وخنقة وظلمة ..

كان الرد عميق جداً وجواه لطف مؤلم جميل فتخيلته كدة ” يأتي على الميت نور يضج قبره كنور الشمس ويقول يا فلان أنا السرور الذي ادخلته على قلب أخيك في الدنيا ” ف هنيئاً لك .

انتو متخيلين كم البهجة اللي بتحصل لحد لما يدخل على بروفايلك ويلاقيك عامل شير لصور حلوة ومناظر تشرح القلب وأخبار مبهجة حتى لو كان جواك ضيق وهم الدنيا ..

اوعى تظهره عالسوشيال ميديا لأنها للأسف مبقتش حل ولا مخرج بالعكس على الرغم من أهميتها وانها بتدينا كل حاجة إلا انها خدت مننا أهم حاجة وهي الرضا ! ..

صدقني محدش هيساعدك غير ربنا هو اللي بينزل السكينة مع البلاء وهو بردو اللي بيشيله من على قلبك ف جه الوقت اللي لازم تكون النور لضلمة حد عشان في الأخرة تلاقي قبرك منور ومفتوح على باب الجنة . ..

الجنة ! هي دي كلمة السر حطها قدامك علطول لما تقرر تعمل اي حاجة وانت هتلاقي في آخر الطريق نور حتى لو كان ظلمة ومطبات وهزائم نفسية هتلاقى الراحة والأمان في الآخر . ..

ده مش كلامي .. ده رسالة ربنا ليك في سورة “ق” ” ادخلوها بسلام ذلك يوم الخلود لهم ما يشاؤون فيها ولدينا مزيد ” .. اتمنى كل واحد يظهر الحلو وبس عالسوشيال ميديا ونبعد تماماً عن الهموم وأخبار الانتحار اللي كترت أوي وبقت تريند في اكتر وقت مينفعش اصلا تكون متشافة ولا ليها قيمة بالمنظر اللي حاصل .