فكر وادب ولغه

فضحكَت فبَشرْناها

كتبت .ماهيتاب احمد عبد الباسط 
من 4 سنين مره واحده صاحبتى كانت تعبانه و وراحت لدكاتره كتير قالولها (هوبلس كيس)

المهم راحت لدكتور كبير فى التخصص ده
الدكتور قالها يا بنتى انتى مفيش رجى اصلا متتعبيش نفسك وتروحى لداكتره تانى

صاحبيتى دى خرجت من عنده من عياطها ودموعا وهيا بتعدى الشارع كانت هتخبطها عربيه

المهم قولتلها هاتى كده الاشعه انا اعرف حد شاطر قوى اوريهاله فادتهالى

عرضتها على الطبيب ده قال نفس الكلام للاسف

وانا رايحالها كنت متردده قووى اقولها ايه

اول لما شوفتها لقيتنى بدون اى تفكير او تخطيط

بضحك قوى وبقولها الدكتور بيقولك الناس دى مبتفهمش على فكره وان نسبه الشفاء كبيره جدا بس التزمى بالتعليمات والدعاء بقى بيحرك الدنيا

صاحبتى وشها ابتسم قوى وصغرت يجى ١٠ سنين
وقعدت تقولى بجد يا ماهيتاب بجد !!!

وانا بقى حبيت نظره السعاده فى عنيها وهاتك يا تجويد بقى 😂
ان الموضوع سهل وطمنى جداااا و و و
المهم مشت من القعده دى وكانها اخدت معاها الدوا اللى هيشفيها فى اللحظه

#اه بالحق صاحبتى دى دلوقتى شُوفيت تماما بفضل الله و للعلم بشكل فيه اعجاز الهى عظيم ودرس فى الثقه بالله

—————————————-

من ٥ سنين كده فيه زميله فى الشغل معروفه انها بتفسر احلام بشكل ما شاء الله ملفت ودائما ما تصيب فى تفسيرها

زميله تانيه مبتتكلمش معاها قالتلى ممكن تسأليها عن الحلم بتاعى من غير ما تقوللها انه حلمى

رحت لزملتنا دى وقولتلها الحلم اللى بصراحه كان واضح انه وحش
وعلى والدها المريض
وفعلا التفسير اللى قالتهولى كان وحش جدا و اى شخص حتى لو مبيفهمش فى الاحلام هيفسروا كده

اول اما وصلت عند زميلتى صاحبه الحلم ولاقيت عنيها زايغه ووشها اصفر ومستنيانى

طبق الاصل الهطل اللى فات ابتسمت وقولتلها بتقولك خييييير كتير الفتره اللى جايه ما شاء الله بركاتك يا ستى

الزميله صاحبه الحلم فاجئتنى برد فعلها
حضنتنى وبكت بصوت بجد يا ماهيتاب الحمد لله الحمد لله اصلى مرعوبه على بابا قوى

#اه بالحق باباها ربنا شفاه وربنا يعطيه الصحه وطول العمر بيشخط فيهم وبيسافروا بعد ما كان مبيتحركش

——————————–

مره سمعت شيخ فى التليفزيون بيقول بشرورووا ولا تنفروا يا جماعه وشوفوا دايما الجزء الجميل فى الامر حتى وان كان ظاهره وحش

الوسوم
اظهر المزيد

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً

إغلاق