الشخصيه الذكوريه المتعفنه

بقلم .بسمه العدل 

اللي بيهين مراته بأي شكل من الأشكال سواء لفظياً أو جسدياً ..

– اللي بيتحكم فيها عشان فاكر نفسه دكر و عنده عضلتين و هو أصلا ميعرفش إن قوته في عقله و حكمته و إحتوائه و حُسن أخلاقه مش في جسمه !

– اللي بيفرض هيمنته لمجرد انه بيشتغل و بيصرف و يا ريته مكفي بيته أصلا ! و ميعرفش إن القوامة ليها شروط

ربنا سبحانه وتعالى يقول:

﴿الرِّجَالُ قَوَّامُونَ عَلَى النِّسَاءِ بِمَا فَضَّلَ اللَّهُ بَعْضَهُمْ عَلَى بَعْضٍ وَبِمَا أَنْفَقُوا مِنْ أَمْوَالِهِمْ﴾

قوامون جمع قوام وقوام صيغة مبالغة، علامة الإهتمام الشديد في الرعاية و الإهتمام و المسئولية التامة الكاملة اللي لازم تكون حريص عليها و أدها يا بلاش ..

✋ قائم يعني بيقوم برعاية الأسرة، يعني المسؤول، يعني المنفق،

✋ يعني المربي هو اللي بيتابع، هو اللي بيوجه، هو اللي بيعلم و يكون قدوة
ده دوره مش مقتصر علي الأم بس ..

﴿وَلَهُنَّ مِثْلُ الَّذِي عَلَيْهِنَّ بِالْمَعْرُوفِ وَلِلرِّجَالِ عَلَيْهِنَّ دَرَجَةٌ ﴾

( سورة البقرة: 228 )

يعني ليها زي ما ليه .. ليه الحق انه يشوفها بمظهر حسن هي كمان ليها الحق انه تشوفه في أحسن مظهر (مش لازم يعدلها بالفانلة علي فكرة ) ..
ليها الحق في الإحترام ليها و لأهلها زي ما ليه حق الإحترام ليه و لأهله ..
ليها الحق انه يصرف عليها زي ما بيصرف علي نفسه و يأكلها من اللي بياكل منه ..
يعرف ان ليها الحق تشوف أصحابها و تشم هوا و تمارس أي حاجة بتحبها زيه ..
ليها الحق تتكلم و ترد و تتناقش ..

انت متجوز بني آدم ربنا خلقلها مخ و احساس زيك بالظبط .. ?

ليها الحق فكلمة شكرا و كتر خيرك و تسلم ايدك .. زي ما انت عايزها تستقبلك بإبتسامة و كلمة حلوة ..

ليها الحق تضايق و تتعب و تقف و تصرخ كمان .. الست بتمر شهريا بتغييرات و لخبطة في الهرمونات بتخليها و لا قادرة و لا طايقة و بتكون أيام أحلك من السواد نفسه .. و بيحصل ده مع كل حمل و رضاعة .. و مع كل خيبة أمل بتمر بيها معاك !!

علاقة الزواج أساسها مودة و رحمة .. أساسها تكامل في الصفات و المهام ..
زي ما هي محتاجلك انت كمان محتاجلها ..
و اعرف ان احترامها من احترامك و سعادتها و راحتها سعادة لكل اللي حواليها ..

كفاية قهر بقي و اتقوا الله في زوجاتكم و عيالكم عشان ربنا منتقم جبار ?