فكر وادب ولغه

خاطرة بو مع بسمة جمال العدل

التنمر الالكترونى ..cyberbullying

كتبت .بسمه العدل

التنمر الالكترونى ..cyberbullying

بمناسبة اعلان إن شريف مدكور مصاب بورم في القاولون و علي الرغم من كم التنمر اللي ناله و هو سليم، فهو بردو مسلمش من التنمر و هو مريض بمرض صعب ربنا يعافيه هو و كل مريض!

علي الرغم من دعاء ناس كتير ليه و انبهارهم بكم السلام النفسي اللي عنده، إلا إن في نفوس و عقول مريضة تهكموا عليه و علي مرضه!

لا شماتة في مرض و لا موت و ده للي يعرف ربنا!
لكن اللي ميعرفوش يقول و يعمل ما بداله!

عند ربنا تجتمع الخصوم و كفي 🤚

من حوالي سنتين كنت كاتبة البوست ده و حابة احطه تاني و هزود عليه 👇

((” كنت بسمع شريف_مدكور ، فالمذيعة بتقوله انه أكتر حد في مصر الناس بتتريق عليه !

قام رادد و كان رده كالتالي :

” إنه مش مسامح في حقه و لا مسامح أي حد بيتريق عليه ، و قام قايل إن شريف “الفرفور ” ده هيدخلكم كلكم النار ..😑
و إن يوم العرض هتيجي ناس تقف كده و يختصموا و هما مش واخدين بالهم !
و إن ربنا بيسامح في حقه لكن مش بيسامح في حق العباد 👌👌و كان ظاهر عليه الآسي و الحزن الشديد و هو بيتكلم ..”

الحقيقة رده عجبني جداً جداً .. في الآخر هو انسان من لحم و دم بيحس و بيشعر ، هو حر و بيعمل اللي بيحبه و مبيأذيش حد !

👈 أوقات كتير نستصغر كلمه أو تريقة علي ممثل أو مشهور ، أو حتي حد معدي في الشارع منعرفوش علي أساس إنه حقنا عادي !

الحقيقه كمان إن إحنا كلنا زي بعض .. و كل واحد حر مدام مبيضرنيش ، مليش أي حق اني أصادر عليه ، لكن ليا مطلق الحرية إني أبعد عنه و أتجنبه و متتبعوش أصلاً !

الفيسبوك بقي مستنقع للتنمر و الإيذاء النفسي لأي حد ، مجرد إن حد مش عجبنا شكله أو لبسه أو حياته .. فبمنتهي السهولة و القسوة بنستبيح و نستحل شتيمته و التريقة علي شكله و خلقته ، و ممكن كمان هتك عرضه و الخوض في حياته اللي أصلا منعرفش عنها أي حاجة و لا يخص حد يعرف أصلاً !

احفظوا و صونوا لسانكم و اتقوا الله في أنفسكم قبل اللي حواليكم ..

وسيبوا اللي يتجوز يتجوز و اللي يطلق يطلق ، و اللي يلبس و اللي يقلع و اللي و اللي .. الخ الخ ..

كل واحد يركز في سكته و طريقه و هدفه و غايته من الدنيا ..و متفرطوش في حسناتكم و تمشوا كده تبعتروها يمين و شمال..

و اختار يا جنة يا نار و انت اللي مسئول عن قرارك و كلمتك قبل فعلك👌

عن معاذ رضي اللّه عنه قال فى حديث طويل وفيه:أن النبى صلى الله عليه وسلم قال: ألا أُخْبِرُكَ برأسِ الأمْرِ وَعمُودِهِ وَذِرْوَةِ سَنامِهِ؟ قلت: بلى يا رسول اللّه! قال: رأسُ الأمْرِ الإِسْلامُ، وَعَمُودُهُ الصَّلاةُ، وَذِرْوَةُ سَنَامِهِ الجِهادُ، ثم قال: ألا أُخْبِرُكَ بِمَلاكِ ذلكَ كُلِّهُ؟ قلت: بلى يا رسول اللّه! فأخذ بلسانه ثم قال: كُفَّ عَلَيْكَ هَذَا، قلت: يا رسول اللّه! وإنا لمؤاخذون بما نتكلم به؟ فقال: ثَكِلَتْكَ أُمُّكَ، وَهَلْ يَكُبُّ النَّاسَ في النَّارِ على وُجُوهِهِمْ إِلاَّ حَصَائِدُ ألْسِنَتِهِمْ؟”ا

صدق رسول الله صل الله عليه و سلم ♡))

عند الله تجتمع الخصوم الحكم العدل العالم بقلوب عباده..
عند الله مفيش تهكم و لا أحكام و لا تريقة علي خلقة و شكل..
عند الله الجزاء و كفي..

اللهم اشفِ شريف مدكور هو و كل مريض شفاء لا يغادر سقماً 🤲

#صونوا_لسانكم
#كل_واحد_حر_ما_لم_يضر
#أنا_ضد_التنمر
#شريف_مدكور
#اللهم_اشفيه
#بسمة_العدل
#خاطرة_بو 🙆

الوسوم

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *