فكر وادب ولغه

رصيد قلبك كام ؟

كتبت .آلاء إبراهيم

رصيد قلبك كام؟
في مقولة بتقول : إن اغلق الله باباً بحكمته، فتح عشر أبواب برحمته. ..
كلنا محتاجين سند في حياتنا محدش قوي طول الوقت وفي حاجات مينفعش تعديها لوحدك لازم كتف تسند عليه ، ودن تسمع من غير ما تزهق وايد تطبطب وتحن عليك وقت الشدة . الحنية زي المياه بتروي، بتشد الجلد، مش بتخليه ينطفي ولا يكرمش بدري، بالعكس بتخلي العين تلمع ، بتخلي القلب يرق ويبقى لين وخفيف زي الطير. ..
في حديث بيقول : عن ابن مسعود رضي الله عنه قال: قال رسول الله صلى الله عليه وسلم: ((ألا أخبركم بمن يحرم على النَّار، وبمن تحرم النَّار عليه؟ على كلِّ هيِّن ليِّن قريب سهل)) .. مجرد ما تجبر بخاطر حد وتعامله بشوية حنية في باب من النار هيتحرم عليك انك تدخله!! متخيلين كم الفرص اللي ضاعت في القسوة والجحود وبعدتنا خطوة عن جنة ربنا ! وعن قلوب ناس كتير ؟! ..
في مقولة للرافعي بتقول ‏إن الله يجمعنا بالطيبين دون سعيٍ منا، فالقلوب على نقائها تقع. ..
احنا عايشين بدقات قلوب حبايبنا وبوجودهم في حياتنا يعني وجود جزمة ابوك على الباب دي نعمة لازم تشكرها كل يوم .. صوت امك في البيت وريحة طبيخها وتعبها عشانك ، وجود ابنك او بنتك في حضنك كل ليلة ، طبطبة اخوك وقت ضيقة ومكالمة اختك بعد نص الليل بالساعات عشان تهون عليك تعب اليوم ، خروجات صحابنا ، ولمة العيلة ، حتى لو حضن حد بتحبه ميتعوضش بصورة قلب في شات ! ..
شيرين عبد الوهاب لما غنت لأحمد ذكي وقالت فيما معناه إنه مشي وراح بس الحنية اللي سابها وراه لسة نهر مبينتهيش، لسة بيجري وبيروي قلوب ناس كتير كان معاها حق .. هو مات لكن الأثر اللي سابه في قلوب اللي حواليه مش هيروح .. .. كل المواقف اللي بتبين حنيتك وخوفك على اللي بتحبهم دي هي اللي هتفضل من بعدك ..ف ياريت نسيب رصيد كبير من الحنية والود في قلوب حبايبنا عشان يفتكرونا بالخير لما نمشي .. ..
ربنا يديم علينا الرحمة في قلوبنا مهما شفنا من قسوة في الدنيا ويديم علينا سماع دقات قلوب حبايبنا طول ماحنا عايشين وبنتنفس ..
الوسوم

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً

إغلاق