فكر وادب ولغه

لا تخلو الحياة من الكدر

كتبت .آلاء إبراهيم

لا تخلو الحياة من الكدر

في مثل انجليزي حلو جدا بيقول : ” Diamonds are only made under pressure ”

يعني كل الضغوطات ومشاعر خيبة الأمل وقلة الحيلة اللي بتمر بيها طول حياتك بتخلق جوة منك جواهر عشان في وقت معين لما تحس ان كل حاجة متقفلة في وشك تلقى طاقة نور خارجة من بين ضلوعك وتفتح قدامك ألف باب و باب ..

اليأس والاكتئاب والفرح والحزن والحنين والحب والكره والرحمة والإنسانية كل دي مشاعر متقسمة جوة قلبك ولازم تحسها وتسيبها تاخد وقتها.. مينفعش تتوجع وتقول أنا تمام و .. مينفعش تخاف إنك تحس ..

افتكر دايماً إنك جوهرة وهييجي اليوم اللي تحس فيه إن الضغط من عليك راح لحاله واتبدل راحة وسلام وسكون . ..

كان في شاب راح يقدم لوظيفة ولقى الشركة عايمة مياه والأبواب متكسرة وهشة.. قعد طول ماهو ماشي يصلح فيها على قد ما يقدر لحد ما وصل لمكتب المدير . وبدأ الحوار بينهم بجملة ” مبروك انت معانا من بكرة في الشركة” ..

الشاب استغرب جداً وقاله يعني أنا نجحت في الاختبار ! رد عليه المدير وقال من أول ما بدأت تاخد بالك من الخراب اللي حواليك وتحاول تصلحه ! ودي كانت البداية . ..

إليزابيث كوبلر ” طبيبة نفسية وكاتبة مشهورة ” كتبت في كتاب ليها عن الضغوطات جملة مهمة أوي بتقول : _ الأشخاص الأجمل من بين الذين قابلتهم هم أولئك اللذين عرفوا كيفية الخروج من الأعماق السحيقة والتعلم منها _ ..

متحاسبوش نفسكم على قرارات انتو اخدتوها بخبرة امبارح لأن لولا النتايج المؤلمة مكناش هنتعلم ازاي نعيش ونكمل ، لولا الحزن والليالي الصعبة اللي عيشتها مكنتش هتعرف طعم الفرح لما يجيلك ! .. الحياة حلوة جداً وتستحق إنها تتعاش بكل مشاعرك ، بكل مشاكلك، وبكل خلية في جسمك لازم تعرف إن الدنيا مش هتقف لو أنت استسلمت بالعكس ماشية .. الحاجة الوحيدة بس اللي هتفضل واقفة مكانها محلك سر هي -انت- لو استسلمت للإكتئاب والحزن .. طب والحل ؟ .. ازعل ودبدب برجلك في الأرض بس ليوم واحد بس وبعدها قوم وكمل لأن محدش هيزوقك لقدام غير نفسك ف أرجوك متخسرهاش وامش الطريق اللي ربنا كاتبهولك صدقني هتوصل للنور اللي في آخر النفق بس انت ترضى. ..

وافتكر دايماً إن آخرة الضلمة ” نور” . ربنا يديم علينا النور في قلوبنا مهما انطفت أنوار الدنيا من حوالينا ومهما اتقفلت في وشوشنا الأبواب.

 

الوسوم

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *