كتبت .آلاء إبراهيم
اختار معركتك اللي تستاهل التعب
في مقولة بتقول اذا أدار الله إتجاه سفينتك لليمين فتأذيتْ وتألمتْ،فاعلم أن اليسار كان موتك المُحتم ! .. مفيش شك إن الواحد ساعات كتير دماغه بتاخده للمعافرة في السكة الغلط واللي للأسف بيكتشف انها كانت غلط بس متأخر اوي ، الحقيقة أي حد فينا مليان حاجات حلوة بس منسوجة في شوية عيوب وثغرات بتخليه مطفي لما يرتكب خطأ في حق نفسه أو الآخرين . محدش معصوم من الخطأ بس الفكرة كلها انك لما تغلط مرة تتعلم من الدرس ولما تغلط تاني متكررش نفس الخطأ عشان ساعات كتير بيكون الخطأ في المرة الثانية بوقعة الشاطر اللي بألف ! .. لما كنا صغيرين كنت بعاقب زمايلي لما يضايقوني بإني اتجنبهم بس في الحقيقة انا كنت بعاقب نفسي انا لاني كنت اكتر شخص بحس بالوحدة في غيابهم عمري ما كنت اتخيل ان الواحد يبقى عايش بطوله كدة من غير صحاب أو ونس بس مع الايام اكتشفت ان قوة المرء بتيجي من جوة ضلوعه مش من قرب أو بعد حد في حياته .. صحيح وجود الناس الصالحين بيفرق في حياتنا بس التغيير الأساسي بيفرق وبيتكون من جوانا احنا لما نكون فعلا عاوزين نتغير بجد … أروى صحبتي قالتلي مرة انا عمري ما شفتك مبسوطة يا آلاء قد الوقت اللي بتتبسطي فيه وانتي بتكتبي وبتطلعي كل الحاجات الحلوة اللي جواكي في شوية حبر على ورق ، مع ان دماغك حلوة وتفكيرك مميز بس للأسف مبتستغليش ده .. أنا عاوزة اقولها شكراً يا أروى لانك دايما بتخليني اشوف النور اللي جوايا في وسط الظلمة اللي بقت طاغية بين قلبي وعقلي .. شكراً من القلب لأهلي ولابني ولاخواتي اللي بجد لولاهم مكنتش هبقى موجودة دلوقتي وبكتب الكلام ده .. الخلاصة/ اختار معركتك اللي تستاهل التعب والمعافرة اختار الناس الصح والتوقيت الصح والمكان الصح عشان لما تتعب وتوصل في الاخر تحس ان ليك قيمة ووجودك فارق ليك وللي حواليك
